— Даурен, матчтың басы мен жалпы барысы туралы не айтар едің?

— Біз ойынды дұрыс бастадық, бірақ футзалда бір сәттік босаңсу бәрін өзгерте алады. Андерлехт — жоғары деңгейдегі, тәртіпті әрі кез келген қарсыласқа қиындық туғыза алатын команда. Олар мұны есепте алға шыққан сәтте көрсетті. Сол кезде бастысы — сабыр сақтау және ойын жоспарынан ауытқымау болды.

— 3:1 есебімен ұтылып жатып, бірінші таймның соңына дейін есепті теңестіру қаншалықты маңызды болды?

— Бұл матчтың шешуші сәттерінің бірі болды деп ойлаймын. Егер үзіліске айырмашылықпен кеткенде, ойын психологиялық тұрғыда басқаша өрбуі мүмкін еді. Ал 3:3 есебі бізге сенім берді, ойынның өз қолымызда екенін көрсетті.

— Екінші таймда «Кайрат» төрт жауапсыз гол соқты. Сол аралықта команданың ойынында не өзгерді?

— Біз ойынды бақылауға көштік. Доппен дұрыс жұмыс істеп, позициялық шабуылда сабырлы әрекет еттік. Қорғаныста жинақы болдық, ал шабуылда мүмкіндіктерді тиімді пайдалана алдық. Бұл — командалық тәртіп пен тәжірибенің нәтижесі.

— Өзің де гол соқтың. Мұндай матчта жеке сәттер қаншалықты маңызды?

— Әрине, гол соғу — кез келген ойыншы үшін жағымды. Бірақ мұндай деңгейдегі ойындарда ең бастысы — команданың нәтижесі. Бүгін әркім өз рөлін дұрыс орындады, мен соған қуаныштымын.

— Мұндай ірі жеңістен кейін қарсыласу тағдыры шешілді деп айтуға бола ма?

— Жоқ, мүлде олай емес. Алда өз алаңымыздағы жауапты матч бар. Андерлехт — тәжірибелі, мінезі бар команда, олар соңына дейін күреседі. Сондықтан біз бұл ойынды тек жақсы бастама деп қабылдаймыз.

— Үйдегі матч алдындағы басты міндет қандай?

— Дәл осы деңгейде дайындалу. Босаңсуға болмайды. Өз жанкүйерлеріміздің алдында ойнаймыз, бұл — үлкен жауапкершілік. Біз келесі матчта да бар күшімізді саламыз.

«ҚАЙРАТ ФУТЗАЛ» Бас серіктесі – «Самрұқ Қазына» ҰӘҚ» АҚ. 

«ҚАЙРАТ ФУТЗАЛ» серіктесі - «Туризм индустриясы мен спортты қолдау қоры» КҚ

@sportqory

@samrukkazyna_official